recent
أخبار ساخنة

شرح شامل وسهل للتجارة الإلكترونية بالدارجة(e-commerce local)

 شرح التجارة الإلكترونية بالدارجة





في هاذ الموضوع غادي نوضح فيه كل ما يتعلق بالتجارة الإلكترونية بالنسبة لي ناوي يبدا فهاذ الدومين، وكذلك غادي نهظر فيه شويا على التسويق الإلكتروني بالنسبة للناس لي عندهم ديجا مشاريع او منتوجات وباغين يسوقوها.. وطبعا غادي نهظر على هادشي بلا زواق بلا كلمات مخلطة بالإنجليزية ودك التبوزيق الخاوي باش نوظر بنادم ويبان زعما خاتر في الدومين.. غادي نعطي دكشي بالشرح الممل وبلغة "الخبز وأتاي".

مفهوم التجارة الإلكترونية 

التجارة الإلكترونية او الإكوميرس كيفما غادي تكون سمعتي عليها هي البيع والشراء عبر الإنترنت.. يعني في بلاصت ما يكون عندك محل او كاري حانوت كتبيع فيه شي منتجات، غادي تبيعها نتا غير في الانترنيت ومن الدار او المكتب ديالك، وماشي ضروري يجي بنادم يشوف السلعة ويديها بيدو، هو كيشوف السلعة لي حاطها نتا في الموقع ديالك على الإنترنت او صفحتك على مواقع التواصل وكيتواصل معاك، سواء عبر خدمة الشراء في الموقع او الواتساب او التلفون وكتفاهموا ونتا كترسلها ليه عبر خدمات التوصيل.. صاااافي هاذي هي التجارة الإلكترونية بكل بساطة.

دبا غادي يكونوا عندك بعض الأسئلة وبعض المفاهيم لي ما عارفهاش، وغادي تجيك هظرتي مختزلة بزاف.. علاش؟ حيت بقيتي كتابع شي وحدين لي دايرين فيها خبراء وكيبقاو على بنادم بالعربية لي مخلطة بالفرنسية والإنجليزية ودك الهظرة الخاوية لي هوما براسهم حافظينها من اليوتيوب.

أسئلة شائعة حول التجارة الإلكترونية 

- أشنو هي الإكوميرس لوكال : هو تبيع منتجات عبر الإنترنت في دولتك او مدينتك. 

- اشنو غادي نحتاج باش نبدا فيها : غادي يخصك بيسي او تلفون وغادي يخصك حساب بنكي وغادي يخصك تكون تعرف لفيسبوك أدس، يعني دير حملات إعلانية في الفيسبوك(تعلم ليه في اليوتيوب) وراس المال طبعا لي ممكن يبدا من 500 درهم لفوق.. 

- واش ضروري خاص يكون عندي موقع إلكتروني : طبعا لا، في الأول غادي تبدا غير بصفحة فيسبوك غادي تحط فيها السلعة ديالك ودير ليها الإعلان وتبدا تهظر مع الناس وتبيع وتشري.. حتى تبان ليك القضية فيها ما يدار وتزاد الخير وكثر عليك دكشي عاد دير موقع إلكتروني ديالك. 

- اشنو هوما الخطوات باش نبدا ؟

أولاً : غادي دخل لليوتيوب وتكتب (فيسبوك أدس) غادي يطلعو ليك بزاف فيديوهات شوف شي واحد لي يدخل ليك الخاطر وتبع معاه حتى تلعم الشادة والفادة وعلى الإعلان في الفيس، علاش؟ باش ملي تبغي تبيع شي منتج غادي يخصك دير ليه الإعلان باش يوصل لأكثر عدد ديال الناس لي مهتمين بالمنتج لي كتبيع.. 

ثانياً : غادي تفتح حساب في شي بنك باش تبقى تخلص فيسبوك ادس ودير الحملات الإعلانية ديالك وتحط فيه فلوسك لي غادي يصيفطو ليك الناس لي غادي يشريو من عندك... 

ثالثاً : غادي تفتح صفحة فيسبوك ودير ليها شي اسم خاص وهو لي غادي يكون العلامة التجارية ديالك فحال الإسم ديال المحل.. ودير ليها شي لوغو ودكشي يكون مستيكي..

رابعا : غادي تمشي تبحث على شي منتجات لي تقدر تمشى ليك، هاذي نتا وشطارتك ما نقدرش نقوليك اشنو تبيع، ختار نتا وخدم دماغك، غادي دير ليه شي تصيورات ناضين اولا فيديو زوين وتكتب شي فقرة قصيرة تشرح فيها المنتوج وتحط فيها وسائل الاتصال فحال التلفون والواتساب وهاذ الفقرة هي باش تجر لكليان وهي لي كتحط مع الصورة في الصفحة ودير ليه الإعلان.. 

خامسا : دبا نتا راك كدير الايكوميرس.. صافي غادي تقابل دكشي وملي يشري من عندك شي واحد المنتوج راك كتصيفطو ليه سواء عبر امانة او شي شركة توصيل او ليفرور او تقدر تليفري بوحدك الى كان في مدينتك باش تنقص عليك المصاريف... 

هادشي لي عطيت الفوق حاولت ما امكن نبسط دكشي ونختصر، واخا كل نقطة من هادشي راه بحر، ولكن غادي تعرف هاذ التخربيق وتزيد تعلم ملي غادي تبدا في الحرفة وما تنساش راه كين اليوتيوب لي تعلمنا منو كاملين.. اي حاجة حصلتي فيها سير كتبها في اليوتيوب راه غادي تلقاها مشروحة... 

مفهوم الدروب شيبينغ 

- اشنو هو الدروب شيبينغ : هو أسيدي ظبر على منتجات لي مطلوبة في مواقع عالمية فحال علي اكسبريس او أمازون وتمشي نتا دير ليها كوبي كولي وتحطها في مواقع اخرى فحال إيباي او شوبيفاي وتزيد ليها في الثمن وملي يشري من عندك شي واحد كتاخد ديك المعلومات لي شرا بيها من عندك وتمشي نتا تشري دك المنتج من الموقع لي هزيتيه منو وتصيفطو للعنوان ديال الشخص لي شراه من عندك، وفارق الثمن لي زدتي هو الرباح ديالك نتا... 

الدروب شيبينغ شويا فيه بزاف ما يتقال وخاصك تقرا عليه بزاف باش دخل ليه، خصوصا ان الاغلبية كيخدموا في إيباي ودبا كين مشكل ديال اغلاق الحسابات، وشوبيفاي كين لي ما باغيش يخلص المصاريف وكين لي كيفضل يدير متجر ووكوميرس.. 

الدروب شيبينغ غادي تحتاج فيه تقريباً نفس الأمور لي هظرت عليها الفوق الى جانب حساب باي بال، وطبعا هادشي فيه دورات في اليوتيوب وفي يوديمي.. الى بغيتي تزيد تعلم كثر.
google-playkhamsatmostaqltradent